Мусаката е традиционално македонско јадење и се подготвува од компири и мелено месо, со додатоци на вкусни зачини. Нималку не се непознати комбинациите со модар патлиџан, или мусака со тиквици, кои се подеднакво вкусни како и класичната верзија со компир.
На толку варијации на тема „рецепт за мусака“, предлагаме да пробате и една поинаква верзија, со тестенини и бешамел сос.
Ова се потребните состојки:
- 350 гр мелено јунешко месо
- 150 гр мелено свинско месо
- 400 гр тестенини (макарони или спирали)
- 400 гр пире од домати
- 1 главица кромид
- сол, бибер, пармезан
За бешамел:
- 60 гр путер
- 60 гр брашни
- 700 мл млеко
- морско оревче
- сол, бибер
Подготовка:
Ставете ги тестенините да се варат и извадете ги минута или две пред да омекнат. Пропржете го исецканиот кромид и додадете го меленото месо, па солта и биберот и мешајте го местото додерка не се испржи.
Додадете го пирето од домати, а потоа динстајте уште 20 минути.
За бешамел сосот стопете го путерот на тава, а во него додадете го брашното и пржете кратко, малку да пожолте, но внимавајте да не загори (правете го тоа на тивок оган). Потоа додадете топло млеко, мешајќи со жица, стевете сол и бибер како и малку морско оревче и оставете да се излади.
Премачкајте ја тавата за печење со масло, а потоа наредете го првиот ред тестенини, додадете мелено месо, неколку лажици бешамел и повторете го процесот со тестенините и бешамел. На крајот посипете со пармезан.
Печете на 200 степени околу 30 минути и оставете да се излади 15 минути пред да служите.
Пријатен вкус!
