Рецесијата која е последица на коронавирусот станува сè подлабока, се заканува дури и распад на еврозоната, изјави во интервју за „Velt“ еврокомесарот за економија Паоло Џентилони.
Џентилони истакна дека економиите на Италија, Франција и Шпанија паѓаат за 10 до 11 отсто, а на Данска, Полска, Шведска или Германија за 4 до 6 отсто.
-Најновите економски податоци предупредуваат дека рецесијата е подлабока од очекуваното, економскиот развој на земјите во еврозоната станува нерамномерен. Тоа за што секогаш предупредувавме е потврдено, рецесијата поради ковид-19 се заканува на распад на еврозоната, изјави еврокомесарот.
Според него, земјите од ЕУ треба во најкраток рок да се договорат за план за обнова на економијата, со цел да се зајакне довербата во националната економија.
Претходно, Европската комисија претстави предлог за формирање фонд за спасување на ЕУ во висина од 750 милијарди евра. Како што е планирано, земјите членки на Унијата ќе добијат помош во форма на грантови до 500 милијарди евра. Овој предлог Европската комисија ќе го достави до земјите-членки на ЕУ и до Европскиот парламент.
