Општина Центар интензивно работи на четвртата фаза од реконструкцијата на улицата „Орце Николов“.
Како што информираат оттаму, реконструирани се коловозните, пешачките и велосипедските површини, се воведува нов систем за модернизација на јавното осветлување, како и резидентно паркирање.
-Една од главните сообраќајници во Дебар Маало ќе добие нов и модерен лик што ќе овозможи зголемена безбедност во сообраќајот и ослободени јавни површини за слободно движење на пешаците и велосипедистите- велат од Општина Центар.
Градоначалникот Саша Богдановиќ апелира до сите граѓани и учесници во сообраќајот да ги почитуваат измените во сообраќајниот режим во Дебар Маало и да бидат внимателни при изведбата на градежните активности.
