Скопскиот аеродром забележа исклучителен раст на бројот на патниците во 64 месеци по ред, при што бројките покажуваат континуиран пораст од јануари 2014 година, пишува „Ексјуавиешн„.
Во првите пет месеци од годинава на меѓународниот аеродром Скопје минале 844.214 патници, што е зголемување за 7,6 проценти. Во истиот период имало 7.096 полетувања и слетувања, а биле пренесени и 1.636 тони товар и пошта.
Од почетокот на годинава Визер воведе две нови линии, од Скопје за Баден и за Бремен, а кон крајот на идниот месец ќе има уште две, за Турку и Ларнака.
Визер во првите пет месеци од годинава го држи првото место по превезени патници, 66,4 отсто, потоа следува Туркиш ерлајнс со 7,2 отсто, Аустриан ерлајнс со 5,1 отсто, Чајна ерлајнс со 4,5, Пегасус ерлајнс со 3,1 и Еделвајс ер и Кроација ерлајнс со заеднички 2,8 отсто од превезените патници.
Истанбул и натаму е најпопуларната дестинација, па 10,3 отсто од сите патници пристигнале или заминале за Истанбул. Следен е Цирих со 7,3 отсто, Базел со 5,5, Виена со 5,2, Малме со 4,5 и Братислава со 3,4 отсто.
Во истиот период аеродромите во Скопје и Охрид заедно имале 914.759 патници што е зголемување за 11 проценти.
