Во МКЦ –клуб ресторан на 22 јануари (20 часот) ќе биде промовирана збирка раскази „Приказни на тивок оган“ на Светлана Камџијаш, објавена во едицијата ПРОаЗА на ИЛИ-ИЛИ.
“Расказите во збирката се создадени со длабока мисла, широка емоција и висока ерудиција, со буен стил и прецизна структура. Нив авторката успеала да ги напише со онаа тешко остварлива виртуозност која подразбира да се раскаже флуидно она што е најтешко за искажување. Способност која можеби најдобро може да се опише ако се обидеме да преобликуваме една констатација искажана за лик во еден од расказите во оваа книга: „Невидливото го правеше видливо“.
За неа, за нејзината раскажувачка умешност и уметност, тоа би било: Невидливото и тешко искажливото го прави видливо, преку зборовите. Во тоа искажување на она што најчесто останува обвиено од молкот, Светлана Камџијаш тргнува од деталот и стигнува до сепроникнувачка целина, започнува со мигот и го опфаќа животот…“, вели писателот Гоце Смилевски.