Во Младинскиот културен центар на 12 јуни (среда), со почеток во 20 часот ќе биде промовирана поетската книга „Помеѓу“ од поетесата Валентина Бактијаревиќ во издание на „Антолог“ од Скопје.
„Помеѓу“ е прва книга на младата поетеса од Ниш, Валентина Бактијаревиќ. Објавена е двојазично – на српски и на македонски јазик, а препевот на македонски го направи Ѓоко Здравески.
„Песните од поетската книга Између/Помеѓу од Валентина Бактијаревиќ, всушност, се впишуваат во една силна и смела поетска линија, соочувајќи нè со најголемата моќ на љубовта – да ги трансцендира границите помеѓу смртта и животот. Книгата е сочинета од љубовни песни, во најубавата и најчистата смисла на зборот. Тие се топли, искрени и човечни лирски посланија до нејзината пријателка Калина Велевска, која близу до снежниот врв Кајмакчалан (прерано и трагично) го загуби животот во февруари 2018 година“, вели Владимир Мартиновски.
