Промоторот на шампионот во тешка категорија во бокс, во верзиите ВБА, ИБФ и ВБО, Украинецот Александар Усик, Александар Красјук, проговори за Британецот Тајсон Фјури по прекинот на преговорите со неговиот тим.
„Верувам дека проблемот на Тајсон Фјури не е во боксот, туку во животот. Работата е во тоа што тој нема цел. Нема насока во која да се движи. Постигна многу и добро заработи. Не е сиромав и не мора да станува во пет наутро за работа.
Што е следно? Има само 34 години, а тоа не е ниту половина од неговиот живот. Веројатно ќе има проблеми, бидејќи нема стабилно размислување. Се движи во круг. Кога мажот не знае каде да оди, тој избира пари. Но, кога ќе купите сè, повеќе нема да се чувствувате добро“, рече Красјук.
Но, претседателот на Светскиот боксерски совет (ВБЦ) Маурицио Сулејман, откри со кого треба да се бори Британецот.
„Според новата конвенција на ВБЦ, борбата меѓу Дионтеј Вајлдер и Енди Руиз ќе го одреди следниот противник на Тајсон Фјури во одбраната на титулата“, изјави Сулејман.
Борбата меѓу поранешните светски шампиони Вајлдер и Енди Руиз Јуниор е закажана за 14 октомври годинава.
