Првиот контејнер со контаминирана земја од ОХИС замина за Германија. Иако земјата измешана со линдан со количина од 126 тони беше одамна ископана и спакувана во седум контејнери, се чекаше на комплетирањето на сите потребни дозволи за извоз. Крајна дестинација на контаминираната земја е Германија, каде ќе биде испорачана во постројка лиценцирана за третман на ваков тип на отпад.
Со тоа завршуваат активностите во кои како имплементациона агенција учествуваше УНИДО. Инспекциските надзори на ископот и пакувањето во текот на 2022 година ги вршеше Пејо Кировски, Виш инспектор од Одделението за инспекциски надзор во животната средина-Скопски регион заедно со помладата инспекторка за животна средина, Ангела Џеповска.
Досега вкупно се ископани, спакувани и извезени 960 тони на HCH отпад од првиот и вториот лот, од кои 480 тони се веќе спалени. Вo реализацијата на вториот лот/дел е вклучена имплементационата агенција УНОПС со средствата обезбедени во Повеќе-партнерскиот фонд за животна средина.
Министерот за животна средина, Насер Нуредини направи обиколка на локацијата во ОХИС каде што е спакувана контаминираната земја со линдан од малата депонија.
– Во наредниот период се очекува да започнат активности за чистење на третиот лот/дел за што во завршна фаза е евалуацијата по огласот за избор на изведувач за чистењето и се очекува во најскоро време постапката да заврши и избраниот изведувач да потпише договор со УНОПС – потенцира Нуредини.
(С.Бл.)
