Основачката на Theranos, Елизабет Холмс (39) се јави на отслужување на 11-годишна затворска казна, јавуваат американските медиуми. Апелациониот суд пред две недели ја отфрли нејзината молба да се брани од слобода додека таа се обидува да ја поништи нејзината осуда за измамата со тестирање на крв.
Холмс беше осудена на 11 години и три месеци затвор за измама на инвеститорите кои вложиле во нејзиниот стартап за тестирање на крвта, чија вредност некогаш се проценуваше на 9 милијарди долари.
Таа беше осудена во јануари за три обвиненија за измама преку интернет и едно обвинение за заговор, откако поротата откри дека криминално ги измамила инвеститорите со лажно тврдење дека технологијата за тестирање на крвта на нејзината компанија може да дијагностицира различни болести со земање примероци од само неколку капки крв.
Во последната пресуда, американскиот окружен судија Едвард Давила и нареди на Холмс да плати 452 милиони долари како отштета на жртвите. Тој препорача Холмс да ја отслужи казната во женски затвор во Брајан, Тексас, пишува Fox Business. Судот го прифати тој предлог.
Елизабет Холмс, најмладата милијардерка, од медиумите беше претставена како една од успешните приказни на Силиконската долина, нарекувајќи ја „женски Стив Џобс“, но следеа обвинувањата за измама, по што вредноста на Теранос падна од 9 милијарди долари на многу помала сума. Холмс набрзо поднесе оставка и му ја препушти директорската позиција на Дејвид Тејлор, поранешниот генерален советник на компанијата.
Од почетокот на 2003 година, кога ја основаше фармацевтската компанија Теранос, преку врвот во 2014 година, кога Форбс ја прогласи за најмлада милијардерка, до последниот пад на имиџот на Холмс во јавноста, таа претрпе трансформација од млада претприемачка надеж во подем до измамник кој ги злоупотребува своите вработени.
Холмс измами истакнати и многу богати семејства, кои ги користеле услугите на нејзината фирма или инвестирале во неа. Дури и ангажираше неколку познати личности да соберат пари за Теранос, чија вредност беше проценета на 9 милијарди долари во својот врв.
Меѓу донаторите беа поранешниот државен секретар Хенри Кисинџер и семејството Волтон, познато по основањето на американскиот синџир супермаркети Волмарт, но откако беше откриено дека нејзината технологија за тестирање на крвта не функционира, многумина го загубија своето богатство.
