Пијанистот и композитор Љубомир Мелник на 22 август, од 21 часот, ќе одржи концерт во зградата на АД „Пошта“.
Како што соопшти Младинскиот културен центар (МКЦ), Љубомир Мелник е еден од најфасцинантните пијанисти и композитори на нашето време. Тој беше наречен „Пророк на пијано“ поради неговата животна посветеност на инструментот и за неговата работа во поместувањето на границите на тоа што може да се направи со него.
Во средината на 1970-тите, додека живееше во Париз, тој создаде „Континуирана музика“ – тотално нов јазик за пијано, кој бара неверојатни технички способности, кои го користат целиот природен глас на пијаното.
-Може веднаш да се препознае дека оваа музика е основана во традиционалната класична техника за пијано, со сеќавање на Лист и Брамс, но исто така содржи многу влијанија од источната филозофија, како и минималната музика, комбинирајќи ги во прекрасна мешавина на модерни романтични хармонии и мелодии. Користејќи ги неговите извонредни пијано способности за да генерира над 19,5 ноти во секунда во секоја рака, тој е најбрзиот пијанист некогаш снимен. Од раните 1970-ти произведе неверојатен опус од повеќе од 120 дела, повеќето за соло или двојно пијано и отвори целосно нови патеки во современата музика, наведуваат од МКЦ.
Билетите за концертот се во ограничен број. Достапни се на билетарница во МКЦ и онлајн преку bileti.mkc.mk по цена од 500 денари
