Пендаровски: Не сум убеден дека ќе има избори на 12 април – тоа не зависи од мене

74

Не можам да бидам убеден дека на 12 април ќе има избори, бидејќи тоа не зависи од мене, вели шефот на државата, Стево Пендаровски во интервју за емисијата „Детектор” на Сител телевизија.

Претседателот потсетува дека тоа е одлука која што ја носи мнозинството во Собранието и дека само од него зависи дали и кога ќе се организираат изборите.

– Не сум убеден бидејќи не зависи од мене. Собранието се распушта со 61 пратеник, кој ќе обезбеди и кога ќе обезбеди, кога ќе сака ќе направи распуштање на Парламентот, вели Пендаровски.

Според него, нема некоја голема разлика дали ќе се оди на предвремени или на редовни избори, бидејќи како што вели, не гледа што е тоа што може да се случи во тој меѓу-период.

– Јас го коментирав тоа и порано. Не е до мене, меѓутоа и така влегуваме скоро во изборна година, може да имаат партиски калкулации двете страни кои јас не ги гледам, но не можам да видам што битно ќе се промени од април до есен или до декември кога е крајниот рок, вели Пендаровски.

Тој истакнува дека нема ништо против Собранието предвремено да го ратификува протоколот за НАТО, бидејќи за членството во Алијансата постои јасна политичка волја кај сите политички субјекти.