И ова лето Р. С. Македонија беше вистинска мека во која пејачите од Србија, Хрватска и Босна заработуваа големи пари. Тоа се огромни суми за кои македонските пејачи од народната и забавната музика можат само да сонуваат. Многу пати оваа појава во времето на ДПМНЕ беше јавно и остро критикувана, но од сето тоа и со промената на власта, со доаѓањето на СДСМ, приказната остана иста, според онаа народната “кучињата лаат, карванот си врви“. Рекордер меѓу пејачите од Србија е фолкерот Саша Матиќ. Тој летово одработил 30 настапи, сите тие настапи не се само во Македонија туку се и во Црна Гора и Босна, а до крајот на месецов го чекаат уште пет. Неговиот хонорар е 13.000 евра, па така Матиќ ова долго топло лето ќе го памти побогат за 455.000 евра, пишува Курир.рс.
–
Мега ѕвездата Цеца Ражнатовиќ е позната по тоа што не настапува секој викенд и што нејзините тезги се значително поскапи од настапите на останатите нејзини колеги. Таа ова лето често пееше во Македонија, а пееше и во соседна Бугарија. И за тоа сè на сè заработила околу 255.000 евра. Лепа Брена летово имала 12 големи концерти, неколку во Македонија (наскоро пак ќе пее кај нас, во Куманово на Плоштад), а нејзиниот просечен хонорар е 20.000 евра, што значи дека е побогата за 240.000 евра. И фолкерот Аца Лукас за настапите во Македонија и во околните земји, добил по 12.000 евра или вкупно заработил околу 288.000 евра. Одлична заработувачка имале и: Здравко Чолиќ, Јелена Розга, Северина, Даниела Мартиновиќ, Владо Георгиев, Жељко Самарџиќ, Петар Грашо, Јелена Карлеуша, Ана Николиќ, Саша Ковачевиќ, Марија Шерифовиќ, Жељко Јоксимовиќ, итн..
–
Заклучокот донесете го сами, но воедно запрашајте се зошто најчесто одите да ги слушате овие пејачи од поранешна Југославија, а не нашите од Македонија? Д.М.
