Општина Центар го одбележа 17 март- Денот на формирањето на Црвениот крст и Денот на крводарителството

43

Под мотото „Донација која доаѓа од срце – Подари живот“,Општина Центар го одбележа 17 март – Денот на формирање на Црвениот крст и Денот на крводарителството.

Доброволното дарување крв, велат од Општината, претставува највисок чин на хуманост и алтруизам со единствена цел, да се мотивираат што поголем број на луѓе да даруваат крв за да можат да се соберат потребните количини крвни единици и да се спасат човечки животи.

Во салата на Советот на Општина Центар, градоначалникот Горан Герасимовски им додели благодарници на 14 истакнати крводарители со најголем број дарувања за 2022 година, во присуство на претседателот на Црвениот крст на ОО Центар, Ивица Бошков и секретарот на Црвениот крст на ОО Центар, Валентина Колеска. За доброволно дарување крв и покажана хуманост и промоција на крводарителството, признание доби и градоначалникот Горан Герасимовски, кој во оваа прилика на младите сограѓани им порача да се придружат кон хуманото семејство, дарувајќи крв и покажувајќи солидарност на дело.

По опоравувањето од КОВИД 19 пандемијата, нагласуваат од Општина Центар, особено радува фактот што оваа општина на ниво на државата е трета по дарување на крвни единици.

-Доброволното дарување претставува израз на високи хумани, морални и етички вредности, а секоја капка крв е драгоцена и може да спаси нечиј живот. Општина Центар има долгогодишна традиција во организирање и спроведување на крводарителски акции во соработка со Црвениот крсти ви порачувам хуманоста да ви биде поттик и мотивација за понатаму, кон постигнување на уште повисоки резултати на планот на крводарувањето – изјави Герасимовски.

Тој истакна дека во иднина Општина Центар ќе дава поддршка и на други социјални и хуманитарни проекти во организација на Црвениот крст, сѐ со цел подигнување на јавната свест на граѓаните околу хуманоста и хуманите гестови. На присутните крводарители им беа доделени пригодни подароци, меѓу кои и слика од уметникот Живко Поповски – Цветин, првиот претседател на Црвениот крст во нашата земја.