Веќе пет години, на првиот ден од октомври се одбележува Интернационалниот ден на кафето. Меѓународната организација на кафето го прогласи 1.октомври за празник на сите љубители и производители на кафето во светот, а настанот беше прв пат обележан во 2015 година во Милано.
Повеќето светски произведувачи на кафе го користат овој ден за промовирање на своите производи и за бесплатно делење кафе на гостите во кафулињата и на штандовите.
Тајната на неодоливоста на овој пијалак е едноставна, за некои ирационална. Впрочем, многумина не би можеле да замислат ден без кафе: со него се почнува денот, со него се водат многу значајни, ама и сосема обични разговори, а притоа е и еден од најевтините пијалоци со кои можете да се почестите себеси и другите. Се консумира насекаде низ светот, и поради тоа, се смета за најпопуларен пијалак на планетата по водата.
Според податоците на светската здравствена организација, во светот се пијат околу 1.5 милијарди шолјички кафе дневно.
Овој напиток се приготвува со варење на пржени семки од растението кафе, вообичаено во вода или во млеко. Растението од кое се добива потекнува од Етиопија, односно од областа Кафа, од каде што и го добило називот. Денес се одгледува претежно во Бразил, држава која на многумина им е прва асоцијација за овој напиток.
