Октомври годинава беше најтоплиот октомври досега регистриран на планетата, објави денеска Европската служба за климатски промени во „Коперникус“, наведувајќи дека се работи за петти последователен месец кога е постигнат топлински рекорд или температурата се приближила до рекордот.
Октомври беше 0,63 Целзиусови степени над просечната температура од референтниот период 1981-2000, со што за малку го урна рекордот од октомври 2015 година, или за 0,01 степени Целзиусови, но беше за 1,2 Целзиусови степени над температурата во прединдустрискиот период.
„Тоа е петти последователен месец во кој се бележи рекордна висока температура или температура многу блиску до рекордот“, наведе „Коперникус“.
Јуни 2019 година беше најжешкиот јуни досега регистриран, а јули го достигна апсолутниот рекорд на најжежок месец досега регистриран. Август 2019 година беше втор по топлина за месец август, а септември постави уште еден рекорд.
Последните четири години беа најтопли досега забележани на планетата, а веќе во август Светската метеоролошка организација процени дека 2019 година ќе биде меѓу петте најжешки години, што одговара на предвидувањата на научниците за влијанието на климатските промени, наведува Франс прес.