Шестмина неидентификувани крадци провалиле во еден од најпопуларните и најраскошните француски дворци, ги врзале нивните сопственици и побегнале со скапоцености и готовина во вредност од најмалку два милиони евра.
„Полицијата трага по шестмина сторители на грабеж кој се случи ноќеска во замокот Во-Викомт, југоисточно од Париз“, изјави обвинителката Беатрис Ангелеји-Ламот, пренесува новинската агенција Асошиејтед прес.
Таа додаде дека крадците не биле вооружени, а сопствениците, брачен пар во 80-ти години не биле повредени.
Замокот од 17-ти век со својот барокен гламур привлекуваше ѕвезди од целиот свет, а познат е по венчавањето на актерката Ева Лонгорија и НБА кошаркарот Тони Паркер во 2007-ма година.
Замокот бил специјално изграден за министерот за финансии на кралот Луј XIV, Никола Фуке, има балска сала со мермерен под, трпезарија со огромен лустер и раскошна градина.
