Откако на крајот од 2019 година доби отказ од челниците на германскиот бундеслигаш Баерн (М), хрватскиот стручњак Нико Ковач неколку месеци беше без работа. Сепак, пред неколку дена, Ковач и официјално беше преставен како нов тренер на францускиот гигант Монако.
И покрај фактот дека со Баерн (М) ја освои дуплата круна, неговата работа на „Алијанс арена“ постојано беше анализирана од клупските челници. Под лупа беше секој негов потег и јавноста беше убедена дека се чека само една причина за да биде ставен крај на соработката со хрватскиот стручњак.
Ковач го загуби авторитетот и беше во „војна“ со неколку староседелци во соблекувалната. Германската јавност беше убедена дека бунтот во соблекувалната бил организиран затоа што Хрватот ја игнорирал клупската легенда, Томас Милер. Срамниот пораз од 5:1 на гостувањето во Франкфурт се покажа како клучен за долго најавуваниот отказ.
Во последното интервју кое го даде за „Л’Екип“, Ковач најпосле призна дека Томас Милер бил најголемиот проблем.
- Нормално дека ќе бидете незадоволни ако не играте за првиот тим. Ако сте ѕврезда и не играте, тогаш сте многу незадоволни и тогаш притисокот врз тренерот е уште поголем. Не беше лесно да се тренира Баерн (М), но ние имавме за задача да освоиме неколку трофеии и освоивме три трофеии. Сфатив што точно ми се случи и тоа искуство ќе ми помогне да бидам уште подобар тренер, изјави Ковач.
