Денеска свечено беше пуштена во употреба спортската сала во средното училиште „Сарај“.
– Ми претставува чест и задоволство денеска да присуствувам на пуштањето во употреба на оваа спортска сала, нешто што ни недостигаше во рамките на ова градско средно училиште, сала којашто ја изградивме заедно во рекордно кратко време за една година. Оваа сала е доказ за она што постојано го говорам дека ако работиме сите заедно, ако имаме квалитетна меѓу институционална соработка, ако имаме поддршка едни со други, успехот е неминовен- изјави скопскиот градоначалник Петре Шилегов кој присуствуваше на настанот.
Тој додаде дека Градот Скопје сериозно инвестира во средните училишта затоа што тој како градоначалник верува дека иднината е на младите и дека треба да им создадат услови за квалитетно образование за тие да останат во државава.
– Ова е првата сала во град Скопје во којашто вонредно вложивме средства, во којашто има и спортски семафори и е опремена да организира и квалитетни државни спортски натпревари, со цел Сарај како општина да ја внесеме на едно повисоко ниво во квалитетот на живеење во нашиот град – истакна Шилегов.
Тој им се заблагодари на Министерството за образование и наука и Општината Сарај за поддршката за реализација на оваа капитална инвестиција.
