Италијанскиот мегахит, романот „Осумте планини“ од Паоло Коњети, добитник на наградата „Стрега“, наскоро ќе биде објавен на македонски јазик од издавачката куќа „Македоника литера“.
“Ова е најпријатно откритие во италијанската литература во последниве години, интересен и извонреден роман, и иако е дело со високи книжевни вредности и со високи награди, за кусо време го „освои“ светот. За една година правата се продадени дури во 39 земји и преведен е на 39 јазици. ‘Осумте планини’ е романескна приказна за пријателство и за планината како метафора на животот. Тоа е приказна за машкото пријателство, осаменоста и семејните врски и за тешкиот пат кон индивидуалниот развој. Стилот на Коњети е од суштинско значење за успехот на романот – лесен и елегантен, а зборовите се одбрани со екстремна точност“, се вели во најавата на издавачот.