Три филма за деца во рамките на проектот „Недела на детски филмови” од денеска до средината на идниот месец ќе бидат прикажани во пет града низ државава. Филмовите се наменети за деца од четири до 14 години. Проектот го спроведува Асоцијацијата на филмски дистрибутери АФИДИ од Битола.
Недела на детски филмови почнува денеска во 18 часот во Домот на културата во Македонски Брод со проекција на германскиот детски филм „Помош, ги смалив родителите” во режија на Тим Трагесер и продолжува задутре (24 октомври) со проекцијата на германскиот филм „Магичното огледало – двојна неволја” во режија на Маркус Х. Розенмилер.
Ќе биде прикажан и швајцарскиот филм „Господин Мол и фабриката за чоколадо” во режија на Мануел Флурин Хендри. Филмовите во рамки на Неделата на детски филм ќе бидат прикажани и во Делчево, Гостивар, Пробиштип и Крива Паланка.
Проектот е поддржан од Министерството за култура во рамките на манифестацијата „Нов културен бран”.
