Една нова студија покажува дека луѓето ја задржале способноста да го разберат античкиот систем на гестови што се користат во комуникацијата од шимпанзата, бонобоата и другите големи мајмуни, објави Тајмс.
Кирсти Греам и Кетрин Хобајтер од Универзитетот Сент Ендрјус во Шкотска поминаа многу време во Африка набљудувајќи диви шимпанза и бонобо. Заедно со колегите, тие идентификуваа неколку десетици гестови кои се користат за давање инструкции, или барања.
Претходните студии покажаа дека видовите кои никогаш не ги вкрстиле патиштата во дивината користеле исти сигнали, а Тајмс забележува дека постои само еден голем мајмун кој не ги користел, а тоа се луѓето.
– Шимпанзата и бонобоата користат околу 80 различни гестови, а нивниот репертоар на вокабулар се преклопува во 90 проценти од ситуациите – рече Греам.
Таа изјави дека ако шимпанзата и бонобото се споредат со горилите и орангутаните, има меѓу 60 и 80 проценти преклопување.
– Овие големи мајмуни изгледа го делат истиот комуникациски систем на гестови. Во принцип, ако бонобо се сретне со шимпанзо, тие веројатно ќе се разберат. Сакавме да знаеме дали луѓето сè уште ја делат истата способност, или тоа е нешто што сме го изгубиле? – изјави Греам.
Тимот регрутираше повеќе од 5.500 луѓе за да направат онлајн тест – тие беа поканети да гледаат 20 видеа со гестови на мајмуни и да го дешифрираат значењето на секое, избирајќи од четири можни одговори. Играчите постигнаа многу повеќе од стапката на успех од 25 проценти што се очекуваше (еден од четири точни одговори), правилно толкувајќи ги гестовите на шимпанзо и бонобо во повеќе од 50 отсто од случаите.
Од сите гестови најдобро се толкуваше гестот „maut strouk“ што значи „дај ми ја таа храна“ и правилно се толкуваше во 80 проценти од случаите.
