Народниот правобранител апелира до граѓаните на кои нема да им бидат вратени парите за наплатени свидетелства да се обратат на бесплатната телефонска линија за деца 0800 88 500, за заштита на нивните права.

Претседателот на Сојузот на средношколци Лука Павичевиќ  на прес-конференција повтори дека станува збор за четири училишта што годинава ги наплатија свидетелствата: Средните училишта за економија и за медицина од Тетово, гимназиите „Зефљуш Марку“ во Скопје и „Мирче Ацев“ во Прилеп.

Министерството за образование и наука на 12 јуни реагираше дека училиштата не смеат да наплаќаат такси на родителите и учениците за издавање на свидетелствата, и дека тоа од нивна страна им било укажано уште пред крајот на учебната година.