Повеќе од 1.800 навивачи на англискиот премиерлигаш Ливерпул ќе поднесат заедничка тужба против Европската куќа на фудбалот (УЕФА) во врска со инцидентот што претходеше на финалето во Лигата на шампиони меѓу „црвените“ и шпанскиот гигант Реал (М) одигран на 28 мај во Париз, соопштија нивните адвокати.
УЕФА го одложи почетокот на финалето во Париз за 35 минути поради „безбедносни проблеми“ предизвикани од англиските навивачи, врз кои полицијата презеде мерки и употреби солзавец додека чекаа да влезат на стадионот.
Меѓутоа, истрагата на францускиот Сенат ги поништи тврдењата на УЕФА и француската Влада дека навивачите на Ливерпул, кои немале купено влезници, биле главната причина за инцидентот.
Навивачите, како што објави нивниот адвокатски тим, планираат да ја тужат УЕФА поради кршење на договорот за продажба на билети и пропусти во врска со безбедноста на навивачите.
Ливерпул од своја страна собра изјави од 8.500 навивачи, како и фотографии и видеоматеријали, кои се доставени до независната истрага нарачана од УЕФА.
