Во комплексот „Осоговски конак”, до 18 август ќе се одржува Младинската ликовна колонија „Свети Пантелејмон“, како дел од годинашната програма на Центарот за култура „Бели мугри“ во Кочани. Колонијата, која е под целосно покровителство на Министерството за култура, најпрвин почна да ја организира Општина Кочани во 2012 година, а самите сместување и творење на учесниците се одвиваа во манастирот „Свети Пантелејмон“ во селото Пантелеј.
– Учесници беа талентирани ученици од повеќе градови низ државата, од Скопје, Куманово, Кочани и од Прилеп. Поради интересот и прекрасното искуство на организаторите и на самите учесници, оваа ликовна колонија во континуитет продолжи да се реализира до ден- денес – соопштија од Националната установа „Бели мугри“.
Годишната граница на учесниците е од 15 до 18 години и ќе работат на сликарски платна во акрилна техника. Тие се предводени и организирани од ментор м-р Александра Димитрова, стручен соработник за визуелни уметности од НУЦК „Бели мугри” – Кочани, каде што, преку разговори и сугестии, се надградуваат и реализираат со сликање и творење.
