Одржливост, а не само реторика, е пораката којашто според лидерот на ВМРО-ДПМНЕ, Христијан Мицкоски, ја носи францускиот нон-пејпер. Како што кажа првиот опозиционер, добрата страна од предлог-измените за пристапниот процес е што по затворање на одредени поглавје ќе може да се користат дел од европските фондови за конкретниот сектор, но нагласи дека негативна страна би можело да претставува реверзибилноста на процесот што може да биде злоупотребено.
„Сега се наметнува правилото на реверзибилност. Доколку отворите поглавје, го преговарате и го затворите и потоа не се придржувате до договореното, тогаш има можност да ве вратат од почеток. Е, сега, таа можност може да биде објективна или пак, да биде субјективна, ако некои земји членки испорачаат до вас субјективни барања, а вие во тој момент не сте подготвени да ги прифатите, како црвени линии и тн.“, рече Мицкоски.