Пратеникот од НСДП, Горан Мисовски, му порача на пребеганиот екс премиер Никола Груевски кој е азилант во Будимпешта, дека се очекува да се врати во земјава и лично да си ја депонира оставката од пратеничката функција, која ја најави преку својот фејсбук профил.

„Читам Груевски ќе си поднел оставка. Членот 65 од Уставот на РСМ е многу јасен: Пратеникот може да поднесе оставка. Пратеникот оставката ја поднесува лично на седница на Собранието. НИКОЛА ТЕ ЧЕКАМЕ ВО РСМ!”, напиша Горан Мисовски на својот Фејсбук профил.

Во член 65 пишува: „Пратеникот може да поднесе оставка. Пратеникот оставката ја поднесува лично на седница на Собранието. На пратеникот му престанува мандатот кога е осуден за кривично дело за кое е пропишана казна затвор во траење од најмалку пет години. На пратеникот може да му биде одземен мандатот кога е осуден за кривично или друго казниво дело што го прави недостоен за вршење на функцијата пратеник, како и за неоправдано отсуство од Собранието повеќе од шест месеци. Одземањето на мандатот го утврдува Собранието двотретинско мнозинство гласови од вкупниот број пратеници“.