Министерот за култура Хусни Исмаили, вчера, имаше средба со албанскиот амбасадор во земјава Фатос Река, на која се разменети мислења за досегашната успешна соработка во областа на културата, како и за потребата од нејзино продлабочување.
Исмаили истакна дека традиционално албанските поети и писатели учествуваат на книжевните манифестации во државава, како што се Струшките вечери на поезијата, а од особено значење е и што мината година нашата земја првпат се претстави на Саемот на книгата во Тирана.
Министерот додал дека традиционално и годинава се поддржува манифестацијата „Македонско културно лето“ во Мала Преспа, а е планирано Албанскиот театар, во рамките на својата балканска турнеја, да гостува и на фестивали во Албанија.
Значителна е и соработката меѓу двете земји на мултилатерален план, преку долгорочниот проект „Прекуграничен биосферен резерват Охрид-Преспа“ и вклученоста во заедничката иницијатива на УНЕСКО и ЕУ – „Кон зајакнато управување со заедничкото прекугранично природно и културно наследство на Охридскиот регион“.
Со цел продлабочување на соработката во тек е и постапката за отворање културно-информативни центри во Скопје и во Тирана.