Германската канцеларка во заминување Ангела Меркел денеска нагласи дека Европската унија мора да биде подготвена да воведе дополнителни санкции кон Русија доколку ескалира ситуацијата во источна Украина и околу таа област, или на белоруско-полската граница.
Таа на заедничката прес-конференција во Берлин со полскиот премиер Матеуш Моравјецки истакна дека ЕУ мора да биде обединета по прашањето за употребата на мигрантите од страна на Белорусија како „оружје“ против Полска и распоредувањето на трупи од Русија во близина на нејзината граница со Украина.
– Секоја натамошна агресија врз суверенитетот на Украина носи висока цена, изјави Меркел, додавајќи дека смирувањето на ситуацијата секогаш треба да биде пожелна опција.
Германската канцеларка во заминување порача дека конфликтот во Украина мора да се реши со дијалог, а агресија врз таа држава ќе бара заеднички одговор од Европската унија.
– Како што беше случајот со Белорусија, ние треба да покажеме европско единство за прашањето за дополнителни санкции што би можеле да бидат воведени доколку не видиме напредок, нагласи Меркел.
