Поранешниот руски претседател Дмитриј Медведев го посети прорускиот сепаратистички регион во источна Украина со неколку високи руски претставници, повикувајќи на натамошни блиски врски со Москва.
Тоа е една од најголемите руски делегации што ја посетиле источна Украина од почетокот на руската инвазија на Украина на 24 февруари.
Медведев рече дека имал „дискусија за приоритетните мерки што треба да се преземат за да се обезбеди безбедноста на републиките во Донбас, по инструкциите на рускиот претседател Владимир Путин“, се вели во соопштението објавено на Телеграм.
„Посебно внимание се посветува на усогласување на законодавството“ на сепаратистичките региони со законодавството на Русија, како и на поправка на инфраструктурата и подготовка за почетокот на учебната година, се додава во соопштението.
Покрај Медведев, во делегацијата биле и заменик-шефот на администрацијата на рускиот претседател Сергеј Кириенко, министерот за внатрешни работи Владимир Колоколцев и шефот на Службата за безбедност (ФСБ) Александар Бортников.
Медведев, кој беше претседател од 2008 до 2012 година, а потоа и премиер од 2012 до 2020 година, во моментов е заменик-претседател на Советот за безбедност на Русија.
Тој се сретна со сепаратистичкиот лидер на Луганск, Леонид Пашечник и лидерот на соседната област Доњецк, Денис Пушилин.
Патувањето на Медведев доаѓа во време кога Москва е осомничена дека подготвува анексија на големи делови од Украина.
