Маричиќ – Гир: ЕУ ќе биде партнер во спроведување на реформите за владеење на правото

48

Клучните реформи во поглед на евроинтеграциите на Северна Македонија се наоѓаат токму во ресорот правда, па поддршката од ЕУ ќе биде мошне значајна за европеизација и трансформација на земјата, изјави министерот за правда Бојан Маричиќ на денешната средба со новиот амбасадор и шеф на Делегацијата на Унијата во Скопје, Дејвид Гир.

Посакувајќи му топло добредојде на новиот евроамбасадор, министерот Маричиќ истакна дека дека правдата е најголем приоритет за граѓаните и дека најголемите очекувања се токму во оваа област: Зголемување на ефикасноста, транспарентност и етика во постапувањето на судовите и обвинителствата.

Како што соопшти Министерството за правда на средбата се дискутираше и околу подготовките во Министерството за правда за почетокот на преговорите и отворањето на Поглавјето 23: Правосудство и фундаментални права.

Маричиќ истакна дека владеењето на правото, изградба на непристрасен, објективен и ефикасен правосуден систем ќе бидат во фокусот на вниманието за време на неговиот мандат, дополнувајќи дека во сите процеси и најавени реформи во правосудството и владеење на правото, ЕУ ќе биде партнер во спроведување на реформите. сп/

Извор:МИА