Францускиот претседател Емануел Макрон сака контроверзната пензиска реформа да стапи на сила до крајот на годината, иако, според анкетите во Франција, до 70 отсто од луѓето ја отфрлаат таа реформа.
-Не можам да бидам реизбран. Не гледам на рејтингот, го правам она што и треба на земјата. Тоа не беше забавно за мене, но мораше да се направи – рече претседателот.
Контроверзната пензиска реформа беше протуркана низ парламентот од владата на Макрон без формално гласање. Владата тогаш едвај преживеа две гласања за недоверба со тесно мнозинство, а во многу француски градови се уште траат насилните протести.
-Мислам дека е штета што не успеавме да ги убедиме сите. Не сум среќен поради тоа, но не се каам – рече Макрон.