Во рамките на програмата „Библиобум“, локалната библиотека „Благој Јанков Мучето“ од Струмица, организира летна ликовна школа за деца.
Школата почна со работа на 2 овој месец, а ја води реномираниот уметник Митко Тошев од Струмица. Ќе трае до крајот на јули, а создадените дела од 25 учесници ќе бидат изложени на „Струмица опен фестивал“.
Програмата опфаќа осум ликовни часа, два пати неделно, а активноста се спроведува во рамки на програмата „Библиобум“, која има за цел да им помогне на локалните библиотеки да креираат позитивни промени во локалните заедници преку дизајнирање на нови услуги и искористување на постојните ресурси на библиотеките со цел на нивна трансформација во центри на знаење, информации и идеи.