Продолжува контролата на Усјенскиот канал, откако во изминатиот период до Инспекторат на град Скопје пристигнале поплаки од граѓани во однос на непријатна миризба и сомневање за нелегално испуштање на отпадни води во Усјенскиот канал.
Притоа, како што информираат од Инспекторатот, лоцирани се нелегално приклучени куќи на физички лица во каналот. Исто така, нелегално приклучување е констатирано и кај еден угостителски објект.
Како што информираат од Инспекторатот, во согласност со законот за комунални дејности, се преземаат сите законски мерки, а контролата продолжува и наредниот период.
Претходно, бил спроведен координиран вонреден инспекциски надзор заедно со Државен инспекторат за животна средина и ЈП „Водовод и канализација“на атмосферскиот канал, кој поминува низ фабриката Титан Цементарница Усје.
Притоа, како што информираат од инспекторатот, било констатирано оштетување на дел од атмосферскиот канал и направен е записник од страна на овластени комунални инспектори.
-Правното лице е задолжено да постапи и да ги отстрани недостатоците утврдени при надзорот. Координираните надзори ќе продолжат и во иднина сè со цел решавање на овој долгогодишен проблем на граѓаните кои живеат во тој дел од градот Скопје -нагласуваат од Инспекторатот на град Скопје.
(А.П.)