Остварувањата „Круната“ (The Crown) и „Потокот на Шит“ (Schitt’s Creek), викендов во рамките на 27. доделување на САГ наградите од Здружението на филмски и телевизиски актери, извојуваа најмногу победи.
Како резултат на пандемијата, времетраењето на годинешната церемонија беше намалено на еден час, наместо вообичаените два. Наградата за најдобра машка филмска улога му припадна на покојниот актер Чадвик Босеман за неговата изведба во „Црното дно на Ma Рајни“, додека Виола Дејвис беше прогласена за најдобра актерка за улогата во истиот филм.
Кога станува збор за телевизиските улоги, Џилијан Андерсон беше прогласена за најдобра актерка за улогата во „Круната“, а серијата доби и награда за извонредна изведба на целиот ансамбл во драмата. Покрај драмата „Круна“, серијата „Потокот на Шит“ освои две награди, во категоријата хумористична серија – за целокупната изведба на екипата, а Кетрин О’Хара беше избрана за најдобра актерка во оваа категорија.
Ања Тејлор-Џој доби награда за улогата во популарната серија „Кралицата Гамбит“ (The Queen’s Gambit), а интересно е што колегата од серијата, Бил Камп, (г. Шајбел), се придружи на наградата од предното седиште на својот автомобил. Награди освоија и: Марк Руфало, Џејсон Судеикис, Јун Јух-Јунг и Џејсон Бетмен.
