Големите финансиски проблем се уште се актуелна тема во полскиот ракометен шампион Киелце, но белорускиот репрезентативец Артем Каралек, откри дека клубот моментно не должи на никој од ракометарите.
-Се обидуваме да мислиме позитивно. Претседателот на клубот вети дека ќе направи се што е до него за Киелце да не банкротира. Тој исто така ни вети и дека ако се сличи најлошото, ние ќе си ги добиеме сите плати. Нашите пари нема да пропаднат. Сите сме професионалци и се подготвуваме за натпреварите и можам да кажам дека во овој момент не ни се должи ништо. Тука сум петта сезона и секоја година се случува ваква ситуација, но секогаш позитивно се решавало. Ракометот не е како фудбалот и постојано се соочуваме со вакви проблеми, еден спонзор заминува, друг доаѓа. Но, секогаш се одржуваме и одлично котираме во Лигата на шампионите, вели Каралек за „BY Sport“
Полскиот шампион игра одлично сезонава во Лигата на шампионите и најверојатно ќе се пласира директно во четвртфиналето од најелитното клупско ракометно натпреварување.
