Според пензиските фондови, најдолго се работи во Италија, Грција, Норвешка, каде што границата за редовно пензионирање е 67 години, а најрано во пензија се заминува во Русија. Во земјите од Балканот, возраста на која може да се оствари пензија е слична и се движи околу 64-65 години. Кај нас, мажите се пензионираат на 64, жените на 62 години, со можност по желба да продолжат да работат до 64, како и мажите
Во секоја земја од Европа, возраста на пензионирање е различна и се движи најмногу до 67, а најмалку до 56 години. Има разлика и во пензионирањето во однос на полот, па така во одредени земји е иста возраста на која се пензионираат и мажите и жените, а во други, пак, жените одат порано од мажите. Според пензиските фондови, најдолго се работи во Италија, Грција, Норвешка, каде што границата за редовно пензионирање е 67 години, а најрано во пензија се заминува во Русија.
Како што анализира МИА, во земјите од Балканот, возраста на која може да се оствари пензија е слична и се движи околу 64-65 години. Кај нас, мажите се пензионираат на 64, жените на 62 години, со можност по желба да продолжат да работат до 64, како и мажите. Исто така, треба да се поседуваат најмалку 15 години работен стаж. Ова е согласно со Законот за пензиско и инвалидско осигурување донесен во 2000 година.
Податоците на европските пензиски фондови покажуваат дека Италијанците мора да работат најдолго. Условот и за мажите и за жените е 67 години и се потребни 20 години работен стаж за предвремено пензионирање. За целосна пензија во оваа земја, потребно е да имаат 63 години и три децении запишани во работната книшка или 36 години работа на опасни работни места.
Мажите и жените во Грција треба да работат до 67 години и да имаат најмалку 15 години стаж, исто како и Норвежаните. Но, во Грција остварувањето на право на пензија е можно и на 62 години и за мажите и за жените, но само доколку имаат над 40 години работен стаж. И во Норвешка старосната граница е 67 години, но може да се оди во пензија и по навршување 62 години ако се има поголем стаж.
Подолго се работи и во Холандија, каде што условите за пензионирање за мажите и за жените се до 66 години и седум месеци. Во Русија, во пензија се оди со 61 година и 6 месеци старост и 13 година пензиски стаж за мажите и 56 години и 6 месеци старост и 13 година стаж за жените. Исто така, можно е и предвремено пензионирање доколку имате поголем број години пензиски стаж.
Во земјите во регионот, возраста на која може да се оствари пензија е слична и се движи околу 64-65 години. Во Србија, на пример, годинава мажите ќе може да одат во пензија со 65-годишна возраст и најмалку 15 години стаж, а жените со навршени 63 години и четири месеци и, исто така, 15 години работен стаж. И едните и другите ќе може да одат во пензија со 45-годишен стаж без разлика на возраста. Очекуваниот животен век во Србија е 74,5 години.
Според податоците на „Евростат“, очекуваниот животен век се разликува во различни европски држави. Така, просекот во земјите на ЕУ во 2020 година изнесувал 80,4 години, што е за 0,9 години пониско споредено со претходната 2019 година. Највисок очекуван животен век имаат жителите на Норвешка – 83,3, Исланд и Швајцарија – по 83,1 години. Италија има очекуван животен век од 82,3 години, додека најмал Бугарија – 73,6 години и Романија – 74,2 години.
– Во Македонија, просечниот животен век е 74,4 години, а во Грција – 81,4 години, потоа следуваат Хрватска – 77,8, Албанија – 77,4, Црна Гора – 75,9, Србија – 74,5 и Бугарија – 73,6 години – анализираат од „Евростат“.
