Во рамки на проектот „Збогатување на туристичката понуда со изградба, уредување и осветлување на пешачко-велосипедска патека на река Брегалница во Берово“, изградена и уредена е пешачко-велосипедска патека од 1.050 метри, ново детско игралиште со урбана опрема од 100 квадратни метри, клупи за одмор и кошници за отпадоци, осветлена патека со енергетски ефикасни ЛЕД-светилки, како и комплетно реконструиран пешачки мост на реката Брегалница.
Проектот е финансиран од Министерство за локална самоуправа во висина од 6.197.173 денари во соработка со општина Берово која овозможи 1.002.983 денари.
– Министерството за локална самоуправа за овој проект вложи 86 отсто од средствата, а со тоа сакаме да потенцираме дека и понатаму ќе се трудиме општините да имаат урбан простор за квалитетен живот на граѓаните, но да биде атрактивен и за туристите. Берово е град што е препознатлив по вкусната органска храна, изобилува со зеленило и чист воздух. Исто така, денеска со особено задоволство сакаме да потенцираме дека го уредивме и речното корито на река Брегалница за износ од од 7.200.156 денари – истакна Горан Милевски, министер за локална самоуправа, соопштија од Министерството за локална самоуправа.
Берово е општина со голем развоен потенцијал, препознатлива е како атрактивна туристичка дестинација за спортско-рекреативниот туризам, која има влијание на развојот на целиот овој регион.
– Горди сме на градот Берово. Ние како општина и понатаму ќе ги промовираме убавините на Берово и ќе овозможиме на нашите сограѓани поквалитетен живот и услови за развој на руралниот туризам. Благодарност до Министерството за поддршката и за целокупната инвестиција која е од особено значење. Сепак, ние како општина одвоивме дел од средства кои се значајни за иднината на овој град, потенцирал градоначалникот на Берово – Звонко Пекевски.
Со овие два проекта се зголемува конкурентскиот капацитет на Берово и на овој регион по течението на реката Брегалница. Ова е еден од 11. проекти што оваа година ги финансираше Министерството за локална самоуправа во Источниот плански регион, во вкупна вредност од 42,2 милиони денари. Проектите се во функција на развој на планскиот регион, но и за развој на селата и на подрачјата со специфични развојни потреби.
Министерот Милевски посочил дека средствата во Буџетот за 2020 година, во програмата Рамномерен регионален развој се зголемени за околу еден милион евра, а вкупно се речиси осум милиони евра. Лично очекувал и се залагал за повеќе средства, но важно е дека задржан трендот на зголемување.
На седницата на Советот за развој на Источниот плански регион, одржана во Виница, Планскиот регион ги утврди приоритетните проекти за развој на регионот, со кои ќе аплицира за средства од Буџетот на државата за наредната година. Со тоа, ќе се зголемат ефектите со реализација на поголеми проекти, за 2020 година како посебен критериум е воведен минимум вредност од шест милиони денари за проектите за развој на планските региони, со исклучок на Скопскиот, кој е најразвиен, каде што минимумот е четири милиони денари.
