Поминаа неколку дена од завршувањето на Зимските олимписки игри во Пекинг, а скандалите продолжуваат да се редат. Имено, шпанската натпреварувачка во уметничко лизгање Лаура Баркеро била позитивна на забранета супстанција за време на ЗОИ во Пекинг, соопшти Меѓународната агенција за тестирање (ИТА).
Тестот на Баркеро бил позитивен на метаболит „клостебол“, кој е на листата на забранети на Светската антидопинг агенција. Примерокот бил земен под надзор на Меѓународниот олимписки комитет како дел од антидопинг контролата за време на натпревар на 18 февруари за време на кратката програма за лизгање во парови.
- Спортистот е информиран за случајот. Таа има право да бара анализа на Б-примерок, се вели во соопштението на ИТА, додавајќи дека работата ќе биде проследена до Одделот за антидопинг на Арбитражниот суд за спорт.
Дваесетгодишната Баркеро и нејзиниот партнер Марко Зандрон завршија на 11-то место во кратката програма за лизгачки спортски парови.
Најпознатата допинг приказна на Игрите беше за 15-годишната лизгачка Камила Валиева, која го освои златниот медал во екипно уметничко лизгање, на која и беше дозволено да се натпреварува во поединечна конкуренција откако се појавија вести за позитивен допинг тест на нејзиното државно првенство во декември.
Украинската боб скијачка Лидија Хунко, иранскиот алпски скијач Хосеин Савех-Шемшаки и украинската скијачка Валентина Каминска исто така беа позитивни за забранетите супстанции за време на Игрите во Пекинг.
