Зголемен бројот на решени барања за легализација во Аеродром

41

Реорганизација на работните процеси и формирање на работни комисии кои ги разгледуваат предметите на граѓаните и правните лица резултираше со поефикасно решавање на барањата доставени до Општината Аеродром, соопштуваат од локалната самоуправа.

Оттаму велат дека за само шест месеци во Општина Аеродром биле издадени решенија за вкупно 355 предмети, била издадена урбанистичка согласност за 200 предмети, а започната е двострана комуникација со странката за 250 предмети и изготвени се уште десетици известувања, пресметки и заклучоци.

Овој значително зголемeн број на завршени предмети и започнати предмети, според општинските власти се должи на новиот начин на работа во Општина Аеродром кој како што нагласуваат овозможил стотици нови решенија за легализација и почеток на процесот за конечно решавање на над 900 предмети.

-За таа цел, формирана е комисија од вработените, со што значително се забрза целиот процес за легализација. Станува збор за еден од најголемите проблеми со кој граѓаните во општината се соочуваат повеќе од 10 години – истакуваат од Општина Аеродром

До сега, до Општината поднесени биле над 9.000 барања за легализација на објекти од различен вид.

Општина Аеродром и понатаму ќе продолжи со реорганизација на администрација со цел нејзино ефикасно искористување, а во насока на постапување во најкраток рок по барањата од граѓаните и правните лица.