Со новиот ребаланс на буџетот на Општина центар за 110 проценти се зголемени средствата за лични асистенти на деца со потешкотии во развојот, со кратење од тековно-оперативните трошоци на Општината, зголемени се и средствата за доделување на стипендии на талентирани ученици од областа на спортот, науката и културата, а за еден милион денари е зголемена ставката за парична помош на лица од семејства со висок социјален ризик, односно наместо досегашните 2,5 милиони денари, сега изнесува 3.5 милиони- соопштија од Општина Центар.
На 36-тата седница на Советот на Општина Центар е усвоено и прифаќањето на донација од „Првиот скопски извиднички одред“ на 30 дрваја кои ќе бидат засадени на различни локации низ општината, а донесен е и Деталниот урбанистички план (ДУП) Градска четврт И 06 – Пролет.
Со новиот ДУП се предвидува изградба на детска градинка, предвидено е решавање на проблемот со паркингот кој жителите го имаат во овој дел од Центар и тројно е зголемена површината за зеленило, односно од 4.283 квадратни метри на 12.811 квадратни метри.
Од Општината наведоа дека советниците ги усвоиле и измените и дополнувањата на програмите за работа на секторите и одделенијата во Општината.