Есенски силен бран на коронавирусот во Македонија не се очекува, бидејќи како што вели министерот за здравство Венко Филипче секојдневно опаѓаат бројот на заразени лица и на хоспитализирани. Сепак, според Филипче не треба да се опуштиме, а вакцинацијата е важен сегмент да не расте бројот на заразени, оти изминатиот период кога во градовите каде што има висок процент на имунизирани граѓани немаше притисок врз болниците.
– Не очекуваме силен бран, односно притисок во болниците, но ние сме спремни да се прифатат пациентите во кој било град. Овој бран беше силен и имаше голем број на новодијагностицирани и пациенти на кои им беше потребно болничко лекување само во градовите каде што е низок опфатот со вакцинација, а во градовите каде беше повисок немаше гужви во болниците. Сега на територија на државата е пораснат опфатот со вакцинација, сметам дека силен бран не би требало да има, но тоа не значи дека не треба да сме внимателни и да ја следиме состојбата – објасни министерот Филипче.
Според него, вакцинацијата го прави своето, бидејќи доколку се заразат вакцинирани лица тоа ќе биде со полесна форма на болеста и тоа е нешто што е случај и во другите земји каде што прилично е висок опфатот со вакцинација.
Во моментов со прва доза во земјава се вакцинирани околу 790.000 граѓани од кои 750.000 се и ревакцинирани, а околу илјада граѓани примиле и трета доза.
Ваквите бројки, посочува Филипче, упатуваат на тоа дека 45 отсто од полнолетното население во државата е вакцинирани, додека ако се земе предвид целокупната популација, тогаш опфатот е околу 38 отсто.
Министерот најави дека за две недели треба да се воведе и најавената мерка дека за влез во затворено ќе бидат потребни две дози наместо една како што е случај сега. Тоа е препорака на Комисијата за заразни болести, за што треба Владата да одлучува.
Што се однесува за скандалот што го обзнани Државниот здравствен и санитарен инспекторат дека лекар „фантом“ две недели лекувал пациентка во домашни услови, освежувајќи ја со засега непознати лекови, а таа починала по само неколку часа од хоспитализацијата, министерот за здравство Венко Филипче вели дека сè уште се истражува случајот, за што е информирано и Министерството за внатрешни работи.
Како што посочи Филипче, единствено што засега е познато е дека случајот го пријавил лекар од ГОБ „8 Септември“ кој ја примил пациентката.
-Ексклузивното право да комуницира и да дава препораки за лекување во домашни услови го има матичниот лекар, поради можноста 24 часа да комуницира со пациентот, да направи проценка на состојбата, да каже дали е за домашно лекување или евентуално да препрати на лекар специјалист и за хоспитализација- објасни Филипче.
Тој апелираше до граѓаните начините на лекување од Ковид да се дискутираат само со матичниот лекар или со лекар специјалист.
-Поради тоа нема еден универзален протокол за лекување. Има протоколи коишто се пратат согласно клиничката слика, манифестацијата и евентуалното присуство на хронични болести. Така што, важно е секогаш да се консултира лекар или матичен, а по препорака на матичниот и лекар специјалист.
(В.Ма.)
