Оваа сабота на фестивалската сцена во Домот на АРМ
–
Фестивалот кој го препознаваме по големиот хит „Многу солзи“ со Маја Оџаклиевска, поради пандемијата ќе биде со строго ограничен број на посетители во салата и со сите пропишани здравствени мерки. Секогаш, па и оваа година, фестивалот ќе му посвети внимание на Тоше Проески, кој, на некој начин, ја започна својата блескава кариера од сцената на “Евро-фест“
Иако естрадата во овие корона-времиња ни е прилично килава, сепак има и настани кои треба да се пофалат, бидејќи да организираш било што е само по себе успех. Така оваа сабота (24 октомври, во салата на скопскиот Дом на АРМ) во текот на продолжениот празничен викенд ќе се одржи традиционално Меѓународниот забавно-музички фестивал “Евро-фест“/Фестивал на европски победници/.
Инаку, овој фестивал го препознаваме по најголемиот хит „Многу солзи“, кој совршено пред многу години го испеа Маја Оџаклиевска, напишан од српскиот композитор Раде Радивојевиќ. Оваа песна на јубилејниот 20-ти по ред фестивал беше прогласена и официјално за најслушана фестивалска мелодија, а наградата лично ја подигна Раде во Скопје од директорот на “Евро-фест“, Костадин Костадиновски.
–
Но, дали знаете дека некако од овој фестивал со својата блескава кариера започна и легендарниот Тоше Проески со хитот “Сонце во твоите руси коси“. Токму така!
И оваа година, и покрај пандемијата, ќе настапат многубројни познати пејачи од дома и странство. Секако дека сето тоа ќе биде со строго ограничен број на посетители во салата, а кои ќе мора да се придржуваат до пропишаните здравствени мерки.
–
Водителката на фестивалот, познатата пејачка и новинарка Јулија Мациевска ни изјави за весникот Вечер, дека многу се радува што повторно, како мината година така и оваа година, ќе го има тоа задоволство да го води овој познат фестивал кој на публиката многу ѝ значи штом толку години опстојува. За тоа им се заблагодарува на Костадин Костадиновски и Катерина Десковска кои ѝ ја укажаа честа. Освен што ќе биде водителка, Јулија ќе пее и нова песна која неодамна ја сними во студиото на Дејан Миленковски.
Дуле Миќиќ
