Одлуката на Германија да ја ограничи употребата на вакцината на АстраЗенека против Ковид-19 на луѓе над 60 години предизвика загриженост дека со тоа дополнително ќе се забави и онака бавната имунизација на населението во земјата, јави ДПА.
Шефот на националното здружение на наставници Хајнц-Питер Мејдингер оцени дека одлуката е „катастрофален удар“ за напорите да се вакцинираат наставниците во текот на април.
– Напорите ќе пропаднат – што значи дека ќе биде потешко да се одржат училиштата отворени – освен ако вакцината АстраЗенека не биде брзо заменета со друг препарат, изјави тој за ДПА.
Во вторникот, германските федерални и министри за здравство се согласија да ја ограничат употребата на вакцината на AstraZeneca за лица на возраст од 60 години и постари поради загриженост за можно предизвикување згрутчување на крвта.
Луѓето под 60 години сепак би можеле да ја примат вакцината, но само по индивидуална проценка на ризик и детално објаснување од лекар, одлучија министрите.
Одлуката на Германија е различна од препораката на Светската здравствена организација и Европската агенција за лекови кои препорачуваат употреба на АстраЗенека за сите возрасти, потенцирајќи дека вакцината е безбедна.
Во меѓувреме, во Германија драстично се зголемува бројот на новозаразени со коронавирус. Врвниот германски виролог, Кристијан Дростен, ситуацијата ја оцени како „многу сериозна и многу компликувана“.
Извор: МИА
