За денеска во 10 часот е закажан колегиумот на Специјалното јавно обвинителство на кој треба да се донесе одлука како ќе се постапува по барањето кое вчера до СЈО го испрати државниот јавен обвинител Љубомир Јовески, со кое се бара предметите од ова обвинителство да се предадат во ЈОРСМ.

Со колегиумот , како што дознаваме, ќе раководат обвинителките Елизабета Јосифовска и Ленче Ристоска. Веднаш потоа, како што велат од СЈО, ќе излезат со официјален став, како е одлучено по ова барање на Јовески.
Инаку, СЈО вчера претпладнево го доби дописот, што до нив го испрати државниот јавен обвинител Љубомир Јовески за префрлање на предметите. Дописот пристигнал на адреса на Специјалното обвинителство.
Јовески завчера изјави дека Обвинителството е подготвено и има капацитет да постапува по сите кривично правни предмети од СЈО и оти се надева дека процесот ќе тече брзо.

Смета дека по преземањето на предметите и евентуално донесување на Законот за јавно обвинителство ќе се одлучи кои обвинители ќе постапуваат по предметите и не е исклучена можноста и досегашните обвинители да постапуваат по предметите.

– ЈАВНОТО ОБВИНИТЕЛСТВО НА РЕПУБЛИКА СЕВЕРНА МАКЕДОНИЈА БЕШЕ ИЗВЕСТЕНО СО ПИСМЕН ДОПИС ДЕКА ЈАВНИТЕ ОБВИНИТЕЛИ ОД ЈАВНОТО ОБВИНИТЕЛСТВО ЗА ГОНЕЊЕ НА КРИВИЧНИ ДЕЛА ПОВРЗАНИ И КОИ ПРОИЗЛЕГУВААТ ОД СОДРЖИНАТА НА НЕЗАКОНСКОТО СЛЕДЕЊЕ НА КОМУНИКАЦИИТЕ (СЈО) СЕ ОВЛАСТЕНИ ДА ГИ ДОСТАВАТ ПРЕДМЕТИТЕ ВО ЈОРСМ. СЛЕДИ ВЗАЕМНО ДОГОВАРАЊЕ ОКОЛУ ТЕХНИЧКИТЕ ДЕТАЛИ ЗА ПРЕДАВАЊЕ НА ПРЕДМЕТИТЕ, МОМЕНТОТ И РЕДОСЛЕДОТ. ОБВИНИТЕЛСТВОТО Е ПОДГОТВЕНО, ИМА КАПАЦИТЕТ ДА ПОСТАПУВА ПО СИТЕ КРИВИЧНО ПРАВНИ ПРЕДМЕТИ. ПО ПРИСТИГНУВАЊЕ НА ПРЕДМЕТИТЕ И НИВНО РАСПРЕДЕЛУВАЊЕ ПО ОБВИНИТЕЛСТВАТА, ПОСТАПУВАЊЕТО ОД СТРАНА НА ЈО ЌЕ ТЕЧЕ СОГЛАСНО ЗАКОНСКИТЕ НАДЛЕЖНОСТИ. СЕ НАДЕВАМЕ ДЕКА ПРОЦЕСОТ ЌЕ ТЕЧЕ БРЗО, ИЗЈАВИ ЈОВЕСКИ.