Судските трошоци кои се проценуваат на околу еден милион долари за двете рочишта што беа одржани во Мелбурн поради проблемите со влезната виза на најдобриот светски тенисер Новак Ѓоковиќ, ќе ги платат организаторите на Австралија Опен, јавија британските медиуми.
Точната сума засега не е позната, но се проценува дека ќе изнесува околу еден милион долари, имајќи предвид дека трошоците по првото рочиште изнесуваа околу 500.000 долари, објави весникот „Дејли Мејл“.
– Најважната работа која луѓето не ја знаат е дека „Тенис Австралија“ ги плаќа судските трошоци за рочиштата на Ѓоковиќ. „Тенис Австралија“ добива пари за организација на грен – слем турнирот во Мелбурн од австралиската Влада, така што тие кои плаќаат данок ќе ги платат и овие трошоци, иако Ѓоковиќ го загуби спорот – тврди извор за „Дејли мејл“.
