Франко Ордине, познатиот италијански новинар, тврди дека Маруо Икарди останал без капитенската лента поради конфликтот со хрватскиот интернационалец, Иван Перишиќ.
Сопругата на Икарди, која истовремено е и негов агент, Ванда Нара, пред неколку дена изјави дека крилниот напаѓач има личен проблем и поради таа причина сака да си замине од редовите на италијанскиот калчо гигант Интер.
- Разговарам со Марота околу новиот договор на Мауро и можам да ви кажам дека ми се допаѓа директорот како човек. Станува збор за господин и за искрена личност. Сите слушнавме како ја искоментира желбата на Перишиќ за промена на клупската средина. Збореше искрено и отворено. Сака да му помогне, но мора да мисли и на Интер. Не знам, можеби позади таа желба на Иван да си замине од Интер има некаков личен проблем, изјави Ванда Нара.
Близок извор до клубот откри дека Хрватот збеснал поради изјавата на Нара и со висок тон му се обратил на тимскиот колега.
- Да и кажеш на својата сопруга никогаш повеќе да не збори за мене на телевизија. Дали ти е јасно?, гласела порката на Перишиќ упатена до Икарди.
Поради фактот дека Хрватот не е единствениот играч на Интер кој има проблем со Аргентинецот, клупските челници решија да му ја одземат капитенската лента и да му ја доделат на искусниот голман, Самир Хандановиќ.