Според објавените финансиски резултати на сајтот на Македонската берза, АД Градски трговски центар, лани остварил вкупни приходи од 234.969.000 денари (3,7 милиони евра) кои се поголеми за 2% во однос на претходната 2021 година, а вкупните трошоци изнесуваат 274.727.000 денари (4,4 милиони евра) кои се за 3% поголеми во однос на претходната 2021 година.
– Остварен е негативен финансиски резултат во бруто износ од 39.758.000. Целта на нашето работење е да оствариме позитивни резултати во наредниот период за тековната 2023 година со максимално ангажирање и целосно искористување на капацитетите со кој располага нашето друштво – се наведува во образложението приложено кон финансискиот резултат.
Загубата од 637.000 евра, според раководството на АД ГТЦ, всушност, е добивка, а „минусот“ се должи на амортизацијата на објектот што влегува во работењето на трговскиот центар, а станува збор за над 4 милиони денари (околу 64.000 евра).
– Старост на објектот, финансиски така се гледа, како старее објектот, така амортизацијата се зголемува, а добивката, ако ја тргнеме амортизацијата на страна, тогаш ГТЦ е со добивка од 4 милиони денари. Долгови има кон добавувачи, но сето тоа се редовно се сервисира на месечно ниво – објаснуваат од АД ГТЦ.
(С.Бл.)
