„Граници“ на Михајло Свидерски – поетска збирка за егзекуција на правдата

206

„Граници“ е наслов на нова поетска книга на Михајло Свидерски во издание на издавачката куќа „Восток“. Според поетесата Ирена Павлова де Одорико, оваа збирка е „Распетие на егзилот“.

Како што наведува, јазикот на поетот е прегнантен, дециден, јасен до неподнослива болка во изложувањето на концептот посветен на прогонствата и страдањата. Темата, посочува, е древна, мачевна и се бави со егзекуцијата на правдата на оние кои го изгубиле домот.

Авторката и книжевен критичар Маријана Јанческа пишува дека во „Граници“, поетот е гласноговорник на сите кои не стигнуваат до насловните страници на весниците, ниту пак до нашите молитви.

-Изразот на поетот е интроспективен и полн со егзистенцијални прашања и рефлексии за луѓето кои ги цртаат границите, но и оние кои катадневно ги поминуваат, истовремено поминувајќи низ рушевините на своето битие. Свидерски говори не само за индивидуалната, туку и за колективната меморија и историја, правејќи нè сите соучесници во приказната за егзилот, пишува Јанческа.

Михајло Свидерски е поет, романсиер, преведувач. Автор е на збирките поезија: „Низ сонот од магли и дождови“, „Ѕвезди што спијат“, „Граници и романите Бело и Црвено“. Ја добива наградата „Новите“ и „Последните денови на Ханс“. Учествувал на повеќе поетски фестивали и читања.

Неговата поезија е преведена на англиски, руски, грчки, бугарски, српски, унгарски, баскиски и албански јазик.