Грчкиот тенисер Стефанос Циципас, ја заврши сезоната на четвртото место на АТП листата, откако освои две титули – триумфираше на Мајорка и на Мастерсот во Монте Карло.
– Си поставив висока граница. Што се однесува до моите шанси за освојување на грен слемовите, треба да го направам тој мал дополнителен чекор што до сега не сум можел да го направам. Чувствувам дека сум блиску до нешто важно, веќе бев трет во светот, но операцијата на лактот малку ме врати назад. Имам намера да се вратам на тоа ниво, сакам да бидам број два и број еден во светот – изјави Циципас.
Сезонава Швајцарецот Роже Федерер се пензионираше, Рафаел Надал не играше долго време поради повреди, додека Новак Ѓоковиќ беше принуден да пропушти одредени турнири, бидејќи не ја прими вакцината против корона вирусот.
Затоа често имаше приказни за наследниците на „големата тројка“.
– Сите сме во таа трка, но не знам дали гледачите се подготвени за тоа. Има само неколку херои во еден успешен спорт, што е она што го прави толку привлечен. Речиси две децении ги имавме Роже, Рафа и Новак, кои се уште се тука. Ние пораснавме со нив. Сега има уште многу играчи кои сакаат да го преземат кормилото, не сум сигурен дали тоа ќе придонесе за популарноста на тенисот, но јасно е дека новите момци се таму – заклучи Циципас.
