Кандидатотот за градоначалник на Центар од СДСМ и Коалицијата, Горан Герасимовски, го претстави социјалниот пакет за граѓаните. Тој денеска вети дека како локална власт ќе обезбедат услуги за поддршка на семејствата од најмладите до највозрасните членови.
Герасимовски најави субвенционирање од 50 отсто на месечните трошоци за згрижување деца во градинка и оброк за учениците од основните училишта во општина Центар, како и финансиска помош за младите.
– За младите планираме субвенционирање еколошки превоз, но и грантови за отворање мали бизниси како поддршка за самовработување. Планираме и финансиска поддршка за младински организации за спроведување проекти важни за општината. Сегашните 60 ученички стипендии кои годишно ги доделува Општината, планираме да ги зголемиме и да доделиме стипендии за ученици од семејства во социјален ризик и еднородителски семејства. Овие стипендии се особено важни затоа што така ќе создадеме еднаква шанса сите млади да можат да го остварат својот целосен потенцијал, без оглед на својата материјална положба, изјави Герасимовски.
Од буџетот на Општина Центар во следниот период, најави Герасимовски, ќе се издвојува 0.1 процент за младите и ќе се отвори социјален фонд за помош на граѓаните во исклучителни случаи како пожар или поплави.
Герасимовски истакна дека Општина Центар ќе води сметка за сите свои граѓани затоа што, како што нагласи, тоа е вистинскиот начин општината да стане модерна и подобра за сите нејзини граѓани.
